Xocalı faciəsi ilə bağlı qətnamə qəbul edildi

Martın 16 və 17-də İslam Əməkdaşlıq Təşkilatı Xarici İşlər Nazirləri Şurasının Mavritaniya İslam Respublikasının paytaxtı Nuakşot şəhərində keçirilən 49-cu sessiyasında Azərbaycanın təşəbbüsü ilə irəli sürülən 5 qətnamə qəbul edilib.

Xarici İşlər Nazirliyinin sözçüsü Ayxan Hacızadə bildirib ki, “Ermənistanın Azərbaycana qarşı təcavüzünün nəticələrinin aradan qaldırılması”, “Azərbaycanın işğaldan azad olunmuş ərazilərində iqtisadi və sosial inkişaf fəaliyyətlərinə dəstək” və “Ermənistanın Azərbaycana qarşı təcavüzü nəticəsində Azərbaycanın ərazilərində islam dininə aid tarixi və mədəni abidələrin və izlərin dağıdılması və təhqir olunması” adlı qətnamələrdə Ermənistan tərəfindən Azərbaycana qarşı 30 ilə yaxın dövr ərzində törədilmiş işğal və təcavüz siyasəti qəti şəkildə pislənilir. Qətnamələrdə bununla yanaşı, işğalın ağır fəsadlarının aradan qaldırılması istiqamətində, habelə bərpa və yenidənqurma işlərində Azərbaycan hökuməti və xalqına dəstək ifadə olunur.

““1992-ci il Xocalı qətliamı qurbanları ilə həmrəylik” adlı qətnamədə 26 fevral 1992-ci il tarixində Xocalıda Azərbaycan mülki əhalisinə qarşı törədilmiş soyqırımı pislənilir, dünya birliyi bu qırğını soyqırımı, insanlıq əleyhinə cinayət və müharibə cinayəti olaraq qəbul etməyə çağırılır və “Xocalıya ədalət” ictimai kampaniyasına dəstək ifadə olunur”, - deyə o əlavə edib.