Xocalı qurbanları burada basdırılıb? | Əsgərandakı kütləvi məzarlıqla bağlı xəbər

Xocalı rayonu ərazisindəki Əsgəran qalası ətrafında aşkarlanan kütləvi məzarlıqda axtarış və qazıntı işləri davam edir.

Bu barədə Əsir və itkin düşmüş, girov götürülmüş vətəndaşlarla əlaqədar Dövlət Komissiyasından məlumat verilib.

Qeyd olunub ki, 2023-cü ilin sentyabr ayında keçirilmiş lokal xarakterli antiterror tədbirlərindən sonra birinci Qarabağ müharibəsi dövründə azərbaycanlı əsir və girovlara işgəncə verməkdə, eləcə də sülh və insanlıq əleyhinə, müharibə cinayətlərini törətməkdə şübhəli bilinən Beqlaryan Raşid Aramayisi ifadəsində özünün də daxil olduğu qanunsuz erməni silahlı birləşmələri tərəfindən əksəriyyəti qadın, uşaq və yaşlı insanlardan ibarət 200 nəfərədək mülki şəxsin 26 fevral 1992-ci il tarixində Əsgəran qalasına yaxın ərazidə pusquya salınaraq avtomat silahlardan atəş açılmaqla qətlə yetirildiyini deyib.

Onun sözlərinə görə, öldürülən şəxslərin üzərindəki şəxsi əşyalar talan edildikdən sonra meyitləri həmin ətrafda basdırılıb. Raşid Beqlaryan cinayət əməllərinin törədildiyi yerləri əyani şəkildə göstərib.

2023-cü ilin noyabr ayında Əsir və itkin düşmüş, girov götürülmüş vətəndaşlarla əlaqədar Dövlət Komissiyasının İşçi qrupu aidiyyəti qurumların mütəxəssis heyətinin iştirakı ilə Raşid Beqlaryanın göstərdiyi ərazidə axtarış və qazıntı işlərinə başlayıb.

Hava şəraitinin əlverişsiz olması qazıntıların müvəqqəti dayandırılmasına səbəb olsa da, sonradan Əsgəran qalası ətrafında axtarış və qazıntı işləri yenidən aparılmağa başlanılıb. Qazıntı prosesində Xocalı soyqırımı zamanı qətlə yetirilən vətəndaşlara aid olduğu ehtimal edilən 8 nəfərin meyitinin basdırıldığı kütləvi məzarlıq aşkarlanıb.

Ərazidə axtarış, qazıntı və ekshumasiya işləri davam etdirilir.