Zatulindən Paşinyanla bağlı qalmaqallı açıqlama

Ermənistan Baş naziri Nikol Paşinyan Qarabağda Azərbaycanla müharibədə uduzduğuna görə bütün məsuliyyəti Rusiyanın üzərinə atmağa çalışır.

Bunu yerli mediaya müsahibəsində Dövlət Dumasının deputatı, ermənipərəstliyi ilə seçilən Konstantin Zatulin deyib.

O, N.Paşinyanın KTMT-yə üzv iki ölkəyə qarşı səsləndirdiyi ittihamları də şərh edib:

“N.Paşinyan KTMT haqqında danışarkən üstüörtülü şəkildə iki dövlətə söz atır. Onun söylədiklərindən belə qənaətə gəlmək olar ki, Baş nazir Rusiya və Belarusu nəzərdə tutur.

Fikrimcə, bunun üçün fərziyyələr irəli sürməyə ehtiyac yoxdur. Mənim mövqeyim çoxdan məlumdur. N.Paşinyan erməni xalqının qəzəbini Rusiyaya yönəltməyə çalışan yalançı və əclafdır, bütün erməni xalqının uzun illər mübarizə apardığı hər şeyi itirir”.

Qeyd edək ki, N.Paşinyan mayın 22-də parlamentdə çıxışı zamanı növbəti dəfə “günah keçisi” axtarışına çıxıb. Qarabağdakı məğlubiyyətini hələ də həzm edə bilməyən Baş nazir açıqlamasında ölkəsinin uğursuzluğunun səbəbkarı kimi yenə də KTMT-ni ittiham edib.