Zəfər simvolu Şuşadan verilən mesajlar

Ümummilli lider Heydər Əliyevin 100 illiyində Prezident İlham Əliyevin Şuşadan xalqa müraciət etməsinin rəmzi, tarixi və siyasi əhəmiyyəti çox böyükdür.

Dövlət başçısının mədəniyyət beşiyindən böyük və məzmunlu nitqi həm xalq, həm də ulu öndərin ruhu qarşısında hesabat idi. Bu, ilk növbədə ölkə liderinin əlamətdar günləri xalqla birbaşa təmas formasında keçirməsi ənənəsinin davamı, həm də Şuşanın yükünü üzərinə götürüb, həyatı tez bir zamanda bərqərar etməsinin bariz nümunəsidir.

Şuşanın bərpa edilməsi Azərbaycan dövlətinin prioritetlərindəndir və bu fəaliyyətin həyata keçməsi ölkə başçısının şəxsən nəzarətindədir. Şəhərdə çoxsaylı təməlqoyma və açılışlar, Prezident İlham Əliyevin, Birinci vitse-prezident Mehriban Əliyevanın xalqımızın tarixinin, mədəni irsinin qorunub saxlanılması üçün gördüyü böyük işlər də bunun bariz nümunəsidir.

Təbii ki, dövlət baçısının Şuşa nitqi Azərbaycanın mövqeyinin məharətli formada bir daha nümayiş etdirilməsi ilə yanaşı, 1993-cü ildən başlayan müstəqillik tariximizin və keçdiyimiz uğurlu inkişaf yolumuzun təhlili xarakteri daşıyır. Bu baxımdan dövlət başçısının verdiyi mesajlar həm də yerli və beynəlxalq platformalar üçün aydın fikirlər ehtiva edir.