Tibbdə inqilab yaradacaq kəşf | Ölüm riski, ürək xəstəlikləri belə müəyyənləşəcək

London İmperial Kollecinin rəhbərlik etdiyi beynəlxalq tədqiqat qrupu erkən ölüm riskini proqnozlaşdırmaqla ürək xəstələrini müalicə edəcək daha effektiv süni intellekt (AI) modeli hazırlayıb.

Bu model yüksək riskli ürək xəstələrinin müəyyən olunmasına kömək edərək onların yaşamaq ehtimalını artıracaq. Tezliklə Britaniyada sınaqdan keçiriləcək sistemin ölüm riskini proqnozlaşdırmaqla daha müvəffəqiyyətli müalicə metodlarının tətbiqini təmin edəcəyi gözlənilir.

Araşdırma nəticəsində “AI-EKQ risk proqnozu” və ya “AIRE” kimi tanınan yeni süni intellekt modeli milyonlarla elektrokardioqramın nəticələrinə əsaslanaraq, ürək xəstəliyi və ölüm riski ilə əlaqədar nümunələri analiz edir. Bu model ölüm riskini müəyyənləşdirə bilir və infarkt, ürək çatışmazlığı, eləcə də ürək ritmi problemlərini də proqnozlaşdırır.

“AIRE” modelinin effektivliyi həqiqi xəstələrin iştirakı ilə aparılacaq sınaqlarda qiymətləndiriləcək. 2025-ci ilin ortalarında planlaşdırılan sınaqlar, ambulator klinikalar və xəstəxana tibbi xidmətlərində xəstələr üzərində həyata keçiriləcək.