101 yaşlı Kövkət nənə

Cəlilabad rayon Göytəpə şəhər sakini 101 yaşlı Kövkət Əbilhəsənovanın həyatı uzunömürlülük baxımından nə qədər maraqlıdırsa, keçdiyi həyat yolu müasir qadınlarımıza örnəkdir. 8 övlad böyüdən Kövkət nənənin 25-dən çox nəvəsi, 15 nəticəsi var.

Uzunömürlü qadın onun 8 Mart bayramını təbrik edənlərə, bir vaxtlar həyat yoldaşından aldığı hədiyyələrdən danışmağı, o xatirələri yenidən yaşamağı çox sevir. Bu xatirələr özündə həm də bir sadə qadının taleyini göz önünə gətirir. Kənd qızı olan Kövkət Əbilhəsənova yaşıdlarının çoxu kimi adətə uyğun valideyn seçimi ilə ailə həyatı qurmayıb. Gələcək həyat yoldaşını ilk baxışdan, bir-birlərini görərək seviblər.

3 il nişanlı qaldıqdan sonra ailə həyatı qurublar. Az sonra isə 2-ci Dünya müharibəsi onları müvəqqəti olaraq bir-birindən ayrı salır. Müharibədən qayıdan həyat yoldaşı kolxozda işləyir. 49 yaşında həyat yoldaşının qəfil ölümü onları bir daha ayrı salır. Heç bir savadı olmayan qadın, həm də evin kişisi olur.

Övladları deyir ki, anamız bizi yığıb hər hansı məsələni hamımızla məsləhətləşib addım atardı. Bir yandan təsərrüfat işləri məşğul olar, digər yandan Bakıya bostan məhsulları aparar, kolxozda işləyər, həm də uşaqlarının təhsilini diqqətdə saxlayardı.

Yazıb-oxumağı bilməyən nənənin nəvələri müxtəlif universtetləri bitirib. Hər birinin adını da, sahib olduqları peşələri də bilir. Ən çox da qız nəvələrinin oxuması ilə qürur duyur.