11 illik münasibətin bitməsinə dözməyən kişi sevgilisindən belə qisas aldı

Sumqayıtda kişi ayrıldığı sevgilisindən qeyri-adi qisas alıb.

33 yaşlı İkram Quliyev 1 həftə əvvəl ayrıldığı sevgilisinin yaşadığı evə gedib və qapını davamlı olaraq döysə də, qadın məhəl qoymayıb. Belə olan halda İkram qeyri-adi yolla qisas almağı düşünüb.

O, kəskin qoxulu naməlum məhlulu evin qapısına və qapının gözcük hissəsinə səpib. Kəskin qoxudan qadının vəziyyəti pisləşib. Onun şikayəti əsasında polis əməkdaşları İkramı saxlayıblar.

İkram Quliyev barəsində İnzibati Xətalar Məcəlləsinin xırda xuliqanlıq və polis, yaxud hərbçinin qanuni tələbinə tabe olmamaq maddələri ilə protokol tərtib olunub.

Zərərçəkən qadın bildirib ki, 11 ildir İkramla sevgi münasibətləri var: “Son zamanlar münasibətimiz pisləşib və 1 həftədir ki, ayrılmışıq. İkram gəlib mənzilimin qapısını fasilələrlə döydü, lakin açmadım. Bundan sonra o, qapıma və gözcük hissəyə kəskin qoxulu maddə tökdü. Qoxudan vəziyyətim pisləşdi və 102 xidmətinə zəng etdim”.

Sumqayıt Şəhər Məhkəməsinin qərarı ilə İkram Quliyev 150 manat məbləğində cərimə edilib.