50 yaşdan sonra nələrlə və necə qidalanmalıyıq? - Qırmızı ət isə...

50 yaşdan yuxarı insanlara sadə karbohidratların və şəkərin qəbulunu məhdudlaşdırmaq, həmçinin pəhrizlərini mümkün qədər şaxələndirmək tövsiyə edilir.

Endokrinoloq Yekaterina Yanqın sözlərinə görə, 50 yaşdan yuxarı insanlarda zülal çatışmazlığından dəri sallanır, əzələlər zəifləyir və sınıq riski artır. Bu problemin qarşısını almaq üçün o, zülalla zəngin qidalar yeməyi tövsiyə edib.

Belə ki, balıq, ət və quş əti kimi qidaları rasionunuza əlavə etməklə sözügedən təhlükələrin qarşısını almaq mümkündür. Eyni zamanda həkim qırmızı ətin həftədə bir və ya iki dəfədən çox olmayaraq istifadəsini məsləhət görüb.

İnsan yaşlandıqca zülallı qidaları həzm etmək çətinləşir. Ona görə də onun emal edilməsi üçün alma sirkəsi, limon suyu, təzə tərəvəz, göyərti və ədviyyatlardan istifadə etmək lazımdır.

Endokrinoloq pəhriz zamanı isə bənövşəyi giləmeyvələrdən istifadə etməyi tövsiyə edib. Çünki həmin giləmeyvələrin tərkibindəki güclü antioksidantlar erkən qocalmanın qarşısını alır. Bununla yanaşı, beynin funksiyalarını inkişaf etdirir və yüksək təzyiqi azaltmağa kömək edir.

Y.Yanq pəhrizə ispanaq, turp və kələm kimi tərəvəzlərin əlavə edilməsinin faydalı olduğunu bildirib. Bu növ tərəvəzlər toksinləri çıxarmağa kömək edir, həmçinin xroniki iltihabı və xərçəng riskini azaldır.