Ağadadaş Ağayev 450 minlik iddiasından niyə əl çəkdi?

Xalq artisti Ağadadaş Ağayevin özəl klinikalardan birinə qarşı mülki iddiası əsasında məhkəmə prosesi yekunlaşıb.

Binəqədi Rayon Məhkəməsində hakim Etibar Mustafayevin sədrliyi ilə keçirilən prosesdə tərəflərin barışıq əldə etdiyinə dair məlumat təqdim olunub.

Bildirilib ki, notariusda barışıq əldə olunub və tərəflər bir-birinə qarşı mülki iddiadan imtina ediblər. Daha sonra məhkəmə iddiadan imtina edildiyi üçün icraata xitam verilməsi barədə qərar qəbul edib.

Qeyd edək ki, 2024-cü ilin iyul ayında Xalq artisti Ağadadaş Ağayevlə özəl klinikalardan birinin mühafizəçisi Nurəddin Cəlilov arasında insident baş verib. Ağadadaş Ağayev mübahisə zamanı mühafizəçiyə balta atıb, balta klinikada xadimə çalışan Nəzakət Paşayevaya dəyib. Mühafizəçi isə Xalq artistini döyüb. Ağadadaş Ağayev klinikanı mülki hüquq pozuntularından yaranan öhdəliklər üzrə mübahisələr – mənəvi zərərin ödənilməsi üçün məhkəməyə verib.

Daha sonra klinika rəhbərliyi də Ağadadaş Ağayevə qarşı iddia qaldırıb. Xalq artisti mənəvi ziyana görə klinikadan 450 min manata yaxın, hospital isə Ağadadaş Ağayevdən 500 min manat pul tələb edib. Qeyd olunan iddia üzrə başlanan cinayət işinə Binəqədi Rayon Məhkəməsində baxılıb.