Ağcaqanadlar hansı rənglərdən qaçır? - Həşəratlarla mübarizədə ağla gəlməyən üsullar

Yay fəslinin yaxınlaşması ilə birlikdə ağcaqanadın səbəb olduğu yuxusuz gecələrin sayı artır.

Ancaq yeni araşdırmalar göstərir ki, düzgün paltar rəngi seçimi ilə bu kiçik, amma narahatlıq yaradan həşəratlardan qorunmaq mümkündür.

ABŞ-də aparılan bir neçə tədqiqatın nəticələrinə əsasən, ağcaqanadları tünd rənglər, xüsusilə qara, tünd göy və qırmızı rəng daha çox cəlb edir.

Alimlər bildirirlər ki, bu rənglər istiliyi daha çox udur və ağcaqanadlar da həm istiliyə, həm də bu rənglərdə əks olunan işığa həssasdır.

Mütəxəssislər tövsiyə edirlər ki, ağcaqanadların aktiv olduğu ərazilərdə və saatlarda insanlar açıqrəngli geyimlərə üstünlük versinlər.

Belə ki, ağ, açıq boz və açıq tonlar ağcaqanadların diqqətini daha az çəkir və bu da insanı daha az “hədəf” halına gətirir. Eyni zamanda bədəni örtən, nazik və hava keçirən paltarlar da əlavə qoruma təmin edir.

Mütəxəssislər qeyd edirlər ki, geyimlə yanaşı, bitki əsaslı təbii vasitələr, məsələn, limon evkalipti və lavanda yağları istifadə etmək effektiv nəticə verir.

Odur ki, mövsümün narahat qonaqlarına qarşı tədbirli olmaq istəyənlər üçün düzgün geyim seçimi artıq sadə, lakin təsirli bir müdafiə üsulu hesab olunur.