Ağsuda yol problemi: Rayon sakinləri uzun müddət davam edən problemdən şikayətçidir - Baku TV

Ağsu rayonunda həm magistral, həm də kənd yollarının vəziyyəti sakinlərin narazılığına səbəb olub.

İsmayıllıdan Ağsuya gələn Göyçay–İsmayıllı–Ağsu avtomobil yolunun bir sıra hissələrində asfalt örtüyü sıradan çıxıb. Ağsu–Şamaxı yolunun da bəzi hissələrinin istifadəyə yararsız olduğu bildirilir.

Rayonun Ərəbuşağı və Ağalarbəyli kəndlərini birləşdirən təxminən 4 kilometrlik yol isə indiyədək asfaltlanmayıb. Yol yalnız torpaq və çınqıldan ibarətdir. Yay aylarında toz, qışda isə palçıq səbəbindən burada hərəkət etmək çətinləşir.

Kənd sakinlərinin sözlərinə görə, yolun bərbad vəziyyətdə olması avtomobillərin tez-tez sıradan çıxmasına və əlavə təmir xərclərinə səbəb olur. Onlar problemlə bağlı dəfələrlə aidiyyəti qurumlara müraciət etsələr də, nəticə əldə olunmayıb.

Bildirilib ki, ərazidə 200-dən çox ev, ümumilikdə isə mindən artıq sakin var. Yerli əhali yolun əsaslı şəkildə təmir olunmasını və asfalt örtüyünün çəkilməsini istəyir.