Akkreditasiyadan keçməyən universiteti nə gözləyir? - Baku TV

Akkreditasiya Şurasının növbəti iclasında Bakı Qızlar Universiteti ilə bağlı qərar qəbul olunub.

Qərara əsasən, ali təhsil müəssisəsinin institusional akkreditasiya üzrə yekun nəticəsi “uyğun deyil” kimi qiymətləndirilib və universitet akkreditasiyadan keçmiş hesab olunmayıb.

İclasda ümumilikdə 7 ali təhsil müəssisəsində aparılmış institusional akkreditasiyanın, həmçinin 16 ali təhsil müəssisəsində ibtidai sinif müəllimliyi və məktəbəqədər təhsil ixtisasları üzrə proqram akkreditasiyalarının nəticələri müzakirə edilib. Bakı Qızlar Universitetində ibtidai sinif müəllimliyi ixtisası üzrə təhsil proqramı da akkreditasiyadan keçməyib. Bundan başqa, universitetə magistratura səviyyəsi üzrə tələbə qəbulu dayandırılıb.

Universitetin müəllimlərindən biri qərarın ədalətsiz olduğunu bildirib. Onun sözlərinə görə, təhsil müəssisəsində dərslər yüksək səviyyədə keçirilir, tələbələr müxtəlif imtahanlarda yaxşı nəticələr göstərirlər.

Qərardan sonra universitetdə təhsil alan tələbələrin gələcək taleyi ilə bağlı da suallar yaranıb. Tələbələr ali təhsil müəssisəsinin fəaliyyətinin dayandırılacağı təqdirdə onların başqa universitetlərə köçürülməsi, ödədikləri təhsil haqları və diplomlarının tanınıb-tanınmayacağı ilə bağlı narahatlıq keçirirlər.