"Alfa Woman Academy"dən iddialara münasibət - Baku TV

Baku TV-nin qaynar xəttinə “Alfa Woman Academy” ilə bağlı şikayətlər daxil olub. Bildirilir ki, akademiyada müxtəlif istiqamətlər üzrə təlimlər keçirilir, stomatologiya kursunun qiyməti isə 4 min manatdan 2 min manata endirilib.

İddialara görə, kurs çərçivəsində dişlərin müalicəsi və stomatoloji prosedurlar öyrədilir. Hətta təlimlər zamanı real xəstələr üzərində praktiki təcrübələrin keçirildiyi bildirilir. Diqqətçəkən məqamlardan biri isə tibbi təhsili olmayan şəxslərə kursu bitirdikdən sonra stomatoloq kimi fəaliyyət göstərmək imkanının vəd edildiyidir.

“Alfa Woman Academy”nin direktor müavini Əli Fərəcov isə sözügedən iddialara münasibət bildirib.

“Haqqımızda yayılan iddialar tamamilə əsassızdır. Akademiyamızda gözəllik sahəsi üzrə müxtəlif kurslar keçirilsə də, stomatologiya kursu mövcud deyil. Səhifəmizdə gedən elana gəlincə, “Instagram” hesablarımız bir gecənin içində oğurlanıb və bu paylaşım bizdən xəbərsiz edilib. Baş verənlərdən səhər xəbər saytlarında gedən məlumatlardan sonra xəbərdar olmuşuq”, – deyə o qeyd edib.