Ali Məhkəmə xarici diplomlarla bağlı qərar verdi | Tələbələrin nəzərinə

Ali Məhkəmə daxil olan şikayət əsasında xaricdə qiyabi təhsil alan tələbənin diplomunun tanınmaması məsələsinə aydınlıq gətirib və bu proses üzrə vahid məhkəmə təcrübəsini müəyyən edən qərarı təqdim edib.

Məhkəmədən verilən məlumata görə, Moskva Politexnik Universitetində qiyabi təhsil alan şəxsə bakalavr diplomu verilib və həmin diplom Rusiyanın səlahiyyətli qurumu tərəfindən apostil olunub.

İddiaçı sənədin Azərbaycanda tanınması barədə orqana müraciət etsə də, rədd cavabı alıb. Səbəb olaraq onun təhsil aldığı ölkədə qısa müddət olması və həmin vaxtın təhsil proqramının mənimsənilməsi üçün kifayət hesab edilmədiyi göstərilib.

Şəxs diplomun tanınması və ekvivalentlik haqqında şəhadətnamənin verilməsi öhdəliyinin cavabdehin üzərinə qoyulması barədə qərar çıxarılmasını xahiş edib. Lakin birinci instansiya məhkəməsi iddia tələbini təmin etməyib, həmçinin apellyasiya məhkəməsi qərarı qüvvədə saxlayıb.

Bundan sonra iddiaçı Ali Məhkəməyə müraciət edib. Ali Məhkəmə qərarında bildirib ki, bu, xaricdə alınan qiyabi bakalavriat təhsilinin Azərbaycanda bakalavriat təhsilinin qiyabi formasına münasibətdə əsas standartlara uyğun olub-olmadığı ilə bağlı məsələdir.

Başqa sözlə, qanunvericiliyə görə, tədris ili ərzində tələbənin müəyyən müddətlərdə tədrisə faktiki cəlb olunmaqla auditoriya dərslərində iştirakı qiyabi formada bakalavriat təhsilinin həyata keçirilməsinin əsas prinsiplərindən biri və müvafiq olaraq Azərbaycan Respublikasında təhsilin bu formasına qoyulan tələb kimi müəyyən edilib.

İddiaçının halında sözügedən tələbə riayət olunmayıb. Qeyd edilənlərə əsasən, iddiaçı tərəfindən verilən kassasiya şikayəti təmin edilməyib, apellyasiya instansiya məhkəməsinin qərarı dəyişdirilmədən saxlanılıb.