Allahın ədalətini başa düşmək çox çətindir | Ölüm hökmü ədalətlidir? - AMİN

Baku TV-nin “Amin” verilişinin yeni buraxılışı yayımlanıb.

Verilişin budəfəki sayında fəlsəfə doktoru Anar Qafarov və Xalq artisti, aktyor Nurəddin Mehdixanlı ilə dində ədalət mövzusu müzakirə olunub.

Anar Qafarov qeyd edib ki, ədalət bütün kitablarda haqq, həqiqət, dürüstlük, hətta təqva məfhumları ilə eyni məzmunda açıqlanır. Ateistlərin səsləndirdiyi “Allah adildirsə, müharibələr niyə olur?!” fikrinə isə fəlsəfə doktoru belə cavab verib:

“Bizim ağlımız hər şeyi dərk edəcək səviyyədə deyil. Mükəmməl olmağı anlamaq mümkün olsaydı, mükəmməl adillər çoxalmış olardı. “Qurani-Kərim”ə nəzər salsaq, görərik ki, Allah insan övladı üçün mövcudluğu bu dünya ilə məhdudlaşdırmır. Var olmaq bitən bir məsələ deyil, axirətdə də varlığımızı davam etdirəcəyik”.

Nurəddin Mehdixanlı isə vurğulayıb ki, ədalətlilik yaradana yaxın olmaq deməkdir:

“Ədalətli olmaq yaradanın yaratdıqlarını tanımaq və qorumaqdır. Ədalət olmasa, Kainatın nizamı pozular. İnsanları maraqlandıran sual var: cənnət haradadır? Cənnət ədalətin olduğu yerdədir. Cəhənnəm isə ədalətin yox edildiyi yerdir”.

Xalq artisti günahın bağışlanması ilə bağlı müzakirə zamanı ölüm hökmünün ləğv edilməsinə diqqət çəkib:

“Bütün dünyadan ölüm hökmünü ləğv etməyi tələb edən ABŞ-də dörd ölüm qaydası var. “Gözə göz, dişə diş” prinsipi daha ədalətlidir, yoxsa Allahın verdiyi yaşamaq haqqını alana həbsxanada da olsa yaşamaq haqqı vermək?”.