“Maşınını, telefonunu göstərirsən, bundan bizə nə?!” - Dində və cəmiyyətdə uğur anlayışı fərqlidir?

“Amin” verilişinin yeni buraxılışında aparıcı, filosof Müşfiq Ötgün və fəlsəfə doktoru Anar Qafarov cəmiyyətdə uğur anlayışı, fərdi nailiyyətlər və valideynlər qarşısında övlad məsuliyyəti barədə fikir mübadiləsi aparıblar.

Müşfiq Ötgünün sözlərinə görə, bu gün bəzi insanlar şəxsi nailiyyətlərini nümayiş etdirməklə uğurlarını paylaşdıqlarını düşünsələr də, əsl uğur yalnız fərdi qazancdan ibarət olmamalıdır:

“Bir adam yeni avtomobil alır, videosunu çəkir, açarı göstərir. Yaxud təzə telefonunun qutusundan çıxarılmasını lentə alır. Yaxşı, mən sənin sevincinə niyə şərik olmalıyam ki? Bu sənin fərdi uğurundur. Bundan cəmiyyətə nə? Əgər uğur gerçəkdən uğurdursa, o həm də insanlığa fayda verməlidir”.

Fəlsəfə doktoru Anar Qafarov isə bəzi gənclərin valideynlərinə münasibətdə məsuliyyət anlayışından danışıb. O bildirib ki, insanın dünyaya gəlməyi öz seçimindən asılı olmasa da, var olmaq özü təşəkkür etməyə əsas verən böyük bir nemətdir:

“Bəzən gənclər arasında belə bir tendensiya görürük. Deyirlər ki, valideynlərim mənim üçün müəyyən şeyləri etməyə məcburdur. Çünki onlara yalvarmamışam ki, məni dünyaya gətirsinlər. Mən də soruşuram: var olmaq yaxşıdır, yoxsa olmamaq? Bu dünya təcrübəsini yaşamaq yaxşıdır, yoxsa yaşamamaq? Deyirlər ki, əlbəttə, var olmaq yaxşıdır. Onda ən azından valideynlərinə var olduğun üçün təşəkkür etməli deyilsənmi? Var olmaq təşəkkür etməyi bizə borclu edir. İlk uğurumuz elə var olmağımızdır”.