"İnsan qorxu və güman arasında olmalıdır" - "İnsan səhv də etməlidir ki..." | AMİN

“Amin” verilişinin yeni buraxılışında fəlsəfə doktoru Anar Qafarovla vicdan anlayışı ətrafında fikir mübadiləsi aparılıb.

O, vicdanın insan üçün fundamental əhəmiyyətini vurğulayaraq bu məfhumu mənəvi aydınlığın mərkəzi kimi xarakterizə edib:

“Vicdan o qədər fundamental bir anlayışdır ki, onu dərk edən insan üçün sanki səhər açılar, başa düşməyən isə bütün ömrü boyu qaranlıqda qalar. Çünki bu, birbaşa insanın varlığı ilə bağlı olan bir məsələdir. Vicdan əxlaqa dair bütün ifadələrimizi əlaqələndirdiyimiz əsas məfhumdur”.

Anar Qafarov həmçinin rahatlıq və özünüdərk arasındakı münasibətdən bəhs edərək çətinliklərin insan ruhundakı roluna diqqət çəkib:

“Bəzən kiminsə travma aldığını deyirlər. Hesab edirəm ki, əslində, ən böyük travma elə rahatlıqdır. İnsan həddindən artıq rahat yaşadığı zaman özünü anlaya bilmir, çünki həmin “işıq” onun gözünü kor edir. İnsanın özünü tanıması və mahiyyətinə varması üçün bəzən qaranlıqlar yaşaması zəruridir”.