ANAMA-dan azad edilən ərazilərə gedənlərə vacib xəbərdarlıq

Minatəmizləmə Agentliyi işğaldan azad edilən ərazilərdə baş verən yanğınlarla bağlı vətəndaşlara çağırış edib.

Qurumun yaydığı məlumatda bildirilir ki, azad olunan ərazilərdə son günlərdə mövsümlə əlaqədar olaraq havaların isti və quraq keçməsi nəticəsində meşə və otlaq sahələrində yanğın hadisələrinin artması müşahidə edilir:

“Azad olunan ərazilərə vətəndaşların istirahət və ziyarət xarakterli səfərlərinin intensivləşməsi və qayıdış prosesində iştirak edən sakinlərin sayının artmasının şahidi oluruq.

Qayıdış prosesində iştirak edən sakinlərdən xahiş olunur ki, odla davranış qaydalarına ciddi riayət etsinlər. Açıq alovdan istifadə zamanı ehtiyatlı davransınlar. Siqaret kötüklərini yerə atmaqdan çəkinsinlər. Çünki baş verə biləcək genişmiqyaslı yanğın hadisəsi zamanı həmin ərazilərdə atılıb qalan mina və digər partlayıcı sursatlar hərarətin təsirindən işə düşə, yaxınlıqda olan hər hansı bir şəxs və ya şəxslərə ciddi ziyan vura bilər”.

Məlumatda həmçinin qeyd edilib ki, beynəlxalq minatəmizləmə standartlarına əsasən, süni maneələr və istehkamlar, eləcə də təbii olan bitki örtüyünün heç bir resurslarla təmizlənməsi mümkün olmayan ərazilərdə yandırma fəaliyyəti kimi prosedur mövcuddur, lakin ANAMA tərəfindən bu kimi fəaliyyət icra edilmir.

Xatırladaq ki, artıq 3-cü gündür azad olunan ərazilərdə boş sahələrdə quru ot və kol-kosun yanması müşahidə edilir. Alovun söndürülməsinə Fövqəladə Hallar Nazirliyinin helikopterləri də cəlb edilib.