Audiovizual Şuradan "MTV"yə ciddi xəbərdarlıq - Baku TV

Audiovizual Şuranın onlayn iclası keçirilib.

İclasda “MTV” kanalının efirində baş verən pozuntu halı müzakirə olunub.

Belə ki, noyabrın 28-də “MTV” kanalının efirində yayımlanan “Xoş sabah” proqramında ailə həyatının görünən və görünməyən tərəfləri, qadın-kişi münasibətlərindəki çətinliklər, müasir ailələrə təsir edən sosial basqılar, rolların dəyişməsi mövzuları müzakirə edilib.

Proqramda iştirak edən qonaqlardan biri boşanmanın inkişaf olduğunu, qadınların hüquqları artmağa başladıqca inkişafın başladığını qeyd edib. Digər bir qonaq isə buna cavab olaraq “bu, inkişaf deyil, əxlaqsızlıqdır” ifadəsindən istifadə edib.

Boşanmanın inkişaf kimi təqdim edilməsi və ya tam əksinə olaraq bunun əxlaqsızlıq adlandırılması, ümumən isə aparıcının belə fikirlərə zəruri müdaxilə etməməsi Audiovizual Şuranın monitorinq mütəxəssisləri tərəfindən qanunvericilik pozuntusu kimi qeydə alınıb, zəruri prosedurlara uyğun olaraq araşdırma aparılıb, hüquqşünaslar tərəfindən pozuntu faktı təsbit olunub.

İclas zamanı Audiovizual Şura üzvləri məsələni ətraflı müzakirə ediblər.

Qeyd olunub ki, boşanma haqqında danışmaq, müzakirələr keçirmək olar, amma boşanmanın “inkişaf” kimi təqdim olunması, digər tərəfdən boşanmanın əxlaqsızlıqla eyniləşdirilməsi qəbuledilməzdir.

Audiovizual Şuranın üzvləri tərəfindən sözügedən məsələ Ailə Məcəlləsinin, habelə “Media haqqında” və “Uşaqların zərərli informasiyadan qorunması haqqında” qanunların bir sıra müddəalarının məqsəd və ruhuna zidd mesaj kimi qiymətləndirilib.

Qeyd olunan yayımla bağlı “MTV” kanalına ciddi xəbərdarlıq olunub.