Ayrılan pullar hara gedir? | Bəzi məmurların əliəyriliyinə görə...

“Dünən Neftçala rayonunda vətəndaşlarla görüşdə olmuşam. DOST Agentliyin işi ilə bağlı müəyyən müraciətlər var. Mən çox xahiş edərdim ki, nazirlik Agentliyin işini yoxlasın”.

Bu fikirləri deputat Sabir Rüstəmxanlı Milli Məclisin növbədənkənar sessiyasının növbəti iclasında deyib.

Deputat vurğulayıb ki, dövlətin çox böyük qayğı ilə ayırdığı vəsaitlər bəzi xırda məmurların əliəyriliyi nəticəsində ünvanlara kifayət qədər gedib çatmır:

“Mən görülən işlərin hamısına kölgə sala bilmərəm. Sosial müdafiə sahəsində çox böyük işlər görürsünüz. Amma konkret şikayətlər varsa, xahiş edirəm, bu yoxlanılsın”.

Əmək və əhalinin sosial müdafiəsi naziri Sahil Babayev isə deputata cavab olaraq bildirib ki, məsələ mütləq araşdırılacaq: “Sadəcə məlumat üçün bildirim ki, Neftçalada DOST Agentliyi yoxdur. Böyük ehtimalla bu, haqqı ödənilən ictimai işlərlə bağlıdır. Haqqı ödənilən ictimai işlər yerli icra hakimiyyəti orqanlarına təhkim edilən işçilərlə bağlıdır. Bunun DOST Agentliyinin fəaliyyəti ilə əlaqəsi yoxdur”.