Azad Mirzəcanzadə inkişaf proqramının növbəti qalibləri elan olunub - Baku TV

Azad Mirzəcanzadə inkişaf proqramının üçüncü dalğasının qalibləri elan olunub.

Üçüncü dalğa çərçivəsində ümumilikdə 196 fərdi və 53 komanda olmaqla 249 müraciət daxil olub. Bunlardan müsabiqə mərhələsinə seçilmiş 60 layihədən 10-u qalib olub. Seçilmiş layihələr texnologiya, təhsil, aqroinnovasiya, ekologiya, mədəniyyət, sosial və elmi tədqiqatlar kimi istiqamətləri əhatə edir.

Qaliblər arasında robot qol layihəsi, sərgi üçün multimedia layihəsi, fermerlər üçün analitik platforma, gənc ailələr üçün təhsil paketi, səyyar kino nümayişlərinin təşkili, veteranların əmək bazarına uyğunlaşdırılması üzrə sosial model, süni intellekt əsaslı təhsil platforması, elektrotexnika və avtomatika üzrə təlim layihəsi, süni intellektdən istifadə edilən ağıllı ekoloji layihə və Qarabağın Paleolit irsinin rəqəmsal sənədləşdirilməsi layihəsi yer alıb.

Üçüncü dalğanın qalibləri arasında təkcə Bakıdan deyil, həmçinin Gəncə, Qəbələ, İsmayıllı, Ağstafa və Xankəndidən olan iştirakçılar da var. Hər bir qalibə 5000 manata qədər maliyyə dəstəyi verilir. Bundan əlavə, layihələrin daha keyfiyyətli planlaşdırılması və dayanıqlı şəkildə həyata keçirilməsi üçün peşəkar və praktiki tövsiyələr, həmçinin təşəbbüslərin tətbiqi mərhələsində texniki dəstək təqdim olunacaq.

Azad Mirzəcanzadə inkişaf proqramı bundan sonra da dəyərlərə əsaslanan yanaşma ilə insan kapitalının inkişafına diqqət yetirəcək və 15–35 yaş arası Azərbaycan vətəndaşlarının potensialının üzə çıxarılmasına töhfə verməyə davam edəcək.