Üçüncü mərhələdə iştirak üçün müraciətlərin qəbuluna start verildi

Azad Mirzəcanzadə İnkişaf Proqramı üçüncü mərhələdə iştirak üçün müraciətlərin qəbuluna başladığını elan edib.

Proqram ölkənin fəal vətəndaşlarında liderlik bacarıqlarının, innovativ düşüncə tərzinin və layihə yönümlü yanaşmanın inkişaf etdirilməsinə yönəlib.

Proqram ölkə üzrə olan istedadlı tələbələri və mütəxəssisləri bir araya gətirərək onlara intensiv təlimlərdən keçmək, şəxsi layihələri üzərində işləmək və aparıcı mentorlar və təcrübəli mütəxəssislərdən ekspert dəstəyi almaq imkanı yaradır.

İlk iki mərhələnin nəticələrinə əsasən, ölkənin müxtəlif yerlərindən olan 16 qalib artıq öz layihələrini biznes və ictimai sektorda həyata keçirib və ya bu işi davam etdirir. Bu təşəbbüslər ölkənin gələcəyinə töhfə verir və müxtəlif sahələri əhatə edir: kreativ sənayelər, rəqəmsallaşma, təhsil, əhalinin müxtəlif təbəqələri üçün iqtisadi dəstək, sosial rifah və sairə.

Üçüncü mərhələnin qaliblərini layihələri üçün 5000 manata qədər qrant, həmçinin təşkilati dəstək gözləyir.

Bütün iştirakçılar liderlik, emosional intellekt, kommunikasiya, innovativ və tənqidi düşüncə, yaradıcılıq və layihə idarəetməsi üzrə praktik yönümlü seminar və təlimlərdə iştirak etmək imkanı əldə edəcəklər. Onlar həmçinin layihənin mentorları kimi çıxış edəcək aparıcı ekspertlərdən mentorluq dəstəyi, müxtəlif sahələrin tanınmış simaları və fikir liderləri ilə tanış olacaqlar.

Proqrama 18-35 yaş arası cəmiyyətin fəal və təşəbbüskar üzvləri olan, inkişaf etməyə, yenilikləri sınamağa və sosial-iqtisadi təsiri olan ideyaları irəli aparmağa hazır olan Azərbaycan vətəndaşları müraciət edə bilərlər. Müraciətlərin qəbulu 25 oktyabr 2025-ci il tarixinədək davam edəcək.