Azərbaycan "PISA 2025" beynəlxalq qiymətləndirməsində böyük uğura imza atdı - Baku TV

Azərbaycan 2022-ci ildə açıqlanan PISA nəticələri ilə müqayisədə hazırda 63 ballıq ümumi artımla dünyada ikinci ən yaxşı nəticə göstərən ölkədir.

Bunu elm və təhsil naziri Emin Əmrullayev PISA 2025 – Şagird Qiymətləndirilməsi üzrə Beynəlxalq Proqramın nəticələrinin təqdimatında deyib.

Nazirin sözlərinə görə, PISA 2025 nəticələri Azərbaycan üzrə ilk dəfə bütün ölkəni əhatə edib. Qiymətləndirmədə 241 məktəbdən 7 500-ə yaxın şagird iştirak edib.

“Ümumilikdə 62 ölkədə geriləmə, 16 ölkədə isə irəliləyiş var. Biz həmin 16 ölkədən biriyik və artıma görə ikinci yerdəyik. Riyaziyyat nəticələri bizi sevindirir. Azərbaycanın riyaziyyat məktəbi kifayət qədər güclüdür və hesab edirəm ki, bu istiqamətdə hələ irəli getməli çox yerimiz var”, – deyə nazir bildirib.

O qeyd edib ki, növbəti PISA qiymətləndirmələrində məktəbəhazırlıqdan gələn şagirdlərin payının artması nəticələrə ciddi təsir göstərə bilər:

“2029-cu ildə imtahan verən uşaqların təxminən 80–90 faizi məktəbəhazırlıqdan gələn uşaqlar olacaq. Bunun nəticələrə kifayət qədər təsir edəcəyini düşünürəm”.