Azərbaycan qadınları barədə statistika

2024-cü ilin əvvəlinə ölkə əhalisinin ümumi sayının 50,2 faizini qadınlar təşkil edib.

Dövlət Statistika Komitəsindən verilən məlumata görə, ötən ildə doğulmuş 112,6 min körpədən 46,9 faizi qız uşaqları olub.

Ölkənin ümumi təhsil müəssisələrində müəllimlərin 82,7, orta ixtisas təhsil müəssisələrində 79,4, ali təhsil müəssisələrində 58,7 faizi, həkimlərin isə üçdən ikisi qadınlardır.

Ümumi təhsil müəssisələrində təhsilalanların 46,6, orta ixtisas təhsili müəssisələri tələbələrinin 62,5 faizini, ali təhsil müəssisələri tələbələrinin isə yarısını qızlar təşkil edir.

Məlumatda həmçinin qeyd edilib ki, elmi işçilərin 59,2 faizi qadınlardır. Azərbaycan Milli Elmlər Akademiyasının həqiqi üzvlərindən 7-si, müxbir üzvlərindən isə 9-u qadındır. Ölkənin sosial-iqtisadi həyatında fəal iştirak edən Azərbaycan qadınları məşğul əhalinin 47,9 faizini təşkil edir. Dövlət qulluğunda çalışanların 29,4, fərdi sahibkarların 22,7 faizi qadınlardır.

Zərif cinsin nümayəndələri ictimai-siyasi sahədə də fəallıqları ilə diqqət cəlb edirlər. Dövlət Statistika Komitəsindən verilən məlumata görə, Milli Məclisdə 1990-cı ildə deputatların 4,3 faizini, 2000-ci ildə 10,7 faizini qadınlar təşkil edirdisə, bu gün millət vəkillərinin 17,9 faizi qadınlardır.

Sürücülük vəsiqəsi alanlar arasında da qadınların sayı artıb. 2008-ci ildə bu sənədi alanların 4,6 faizi qadınlar olduğu halda, 2023-cü ildə rəqəm 12 faizədək artıb.