Azərbaycan və Çin cərrahları xəstə üzərində məsafədən və eyni anda robotik əməliyyat icra etdilər

Azərbaycan səhiyyəsində tarixi hadisə baş verib. Milli Onkologiya Mərkəzində (MOM), "Texnologiyalar Sərhəd Tanımır: Biz Sağlamlıq Uğrunda Birləşirik" devizi altında keçirilən "Robotlaşdırılmış Cərrahiyyə Körpüsü-2025" tədbiri zamanı, Azərbaycan və Çin cərrahları birgə şəkildə uzaqdan idarə olunan robotik əməliyyat icra ediblər. Əməliyyat Bakıda yerləşən real bir xəstə (65 yaşlı qadın) üzərində, Çinin Kangduo şirkətinin robot-assistent sistemi ilə aparılıb. MOM-un Baş həkimi Azad Kərimlinin sözlərinə görə, bu, ölkənin tibb tarixində ilk dəfədir baş verir və telecərrahiyyə sahəsində böyük bir nailiyyətdir. Uğurla nəticələnən bu əməliyyat Azərbaycanın tibb sektorunda robotik texnologiyaların tətbiqini genişləndirmək üçün yeni imkanlar açır və beynəlxalq tibbi əməkdaşlığı gücləndirir.