Bakıda ana yeni doğulan övladını zibil yeşiyinə atdı

Bakıda ana 10-15 günlük körpəsini zibil qutusuna atıb. Həmin anın görüntüləri yayılıb.

Belə ki, qadın əlində zibil dolu sellofanla qutuların yerləşdiyi əraziyə gəlib. Qısa müddət ətrafı müşahidə etdikdən sonra ilk olaraq əlindəki zibili, sonra isə körpəsini qutuya ataraq ərazidən uzaqlaşıb. Bir qədər sonra iki nəfər zibil qutusundan körpəni taparaq çıxarıb.

Körpə Bakı Şəhər Sabunçu rayonu 12-ci polis bölməsi, Təcili və Təxirəsalınmaz Tibbi Yardım briqadası vasitəsilə Səhiyyə Nazirliyinin 1 nömrəli Körpələr Evinə qəbul edilib. Körpə qəbuldan sonra tibbi müayinədən keçirilməsi üçün 2 saylı Qarayev adına Uşaq Kliniki Xəstəxanasına göndərilib. Tibbi Ərazi Bölmələrini İdarəetmə Birliyindən bildirilib ki, ona ilkin tibbi yardım göstərilib, lazımi müayinələrdən keçirilib. Hazırda körpənin vəziyyəti ağırdır.

Polis əməkdaşları uşağın anasının 1992-ci il təvəllüdlü Səbinə Qasımova olduğunu müəyyən edərək onu polis şöbəsinə gətiriblər. Hazırda həmin şəxs barəsində toplanmış materiala hüquqi qiymət verilməsi üçün iş Sabunçu Rayon Polis İdarəsinin İstintaq şöbəsinə göndərilib. Araşdırmalar davam edir.