Bakıda kirayə ev qiymətləri əl yandırır

Kirayə mənzil bazarında canlanma hiss olunur. Tədris ilinin başlamasına az müddət qaldığını nəzərə alsaq, regionlarda yaşayanların paytaxta üz tutması ilə kirayə mənzillərin qiyməti birə-beş artıb.

Məsələ ilə bağlı daşınmaz əmlak üzrə ekspert Ramil Qasımzadə bildirib ki, ali məktəblərin yerləşdiyi Yasamal rayonunda bu ərəfədə qiymətlər daha baha olur:

“Yasamal rayonunda 1 otaqlı mənzil minimum 400 manata kirayəyə verilir. Şəhərin başqa ərazilərində isə eyni tipli mənzil 300 manata təklif edilir. Hazırda bina evlərində qiymətlər minimum 300 manatdan başlayır. Qiymətlər 1 otaqlılarda 300-400 manat, 2 otaqlılarda 400-600 manat arasında dəyişir. 3 otaqlı mənzillər isə 500 manatdan başlayaraq daha baha qiymətə təklif edilir”.

Qeyd edək ki, hazırkı vəziyyətdə paytaxtın Yasamal, Nərimanov, Nəsimi və Səbail rayonlarında yerləşən mənzillər digərlərindən daha baha qiymətə təklif olunur.