Müştəri “plyonka”nı sökdürür ki, cərimələyirlər.. | Qurum məsələyə aydınlıq gətirdi

Sürücülərdən biri iddia edir ki, avtomobilində “plyonka”dan istifadə etdiyi üçün polis əməkdaşları tərəfindən cərimə olunub.

O bildirib ki, şüşə örtüyünü avtoservisdə yoxladıb, hər şey qaydasında olsa da, ona cərimə tətbiq olunub.

Maraqlıdır, bəs görəsən bununla bağlı qanunvericilik nə deyir?

Nəqliyyat eksperti Elməddin Muradlının sözlərinə görə, istehsalçı zavod əgər sözügedən “plyonka”ları istehsal edirsə, deməli o, proses zamanı işığın paylanma dərəcəsini nəzərə alır:

“İşığın səpələnmə, düşmə bucağı aydındırsa və sürücü üçün heç bir problem yaranmırsa, bu zaman heç cərimə tətbiq oluna bilməz. Ümumiyyətlə, bu sahədə bizdə bəzi boşluqlar var”.

Sözügedən problemlə qarşılaşan sürücülərin sayı çoxdur. Polis əməkdaşları isə bu halı qanunsuz hesab edirlər.

Baş Dövlət Yol Polisi İdarəsinin rəsmisi Mübariz Ağayev bildirib ki, nəqliyyat vasitəsinin xarici işıq cihazlarının üzərinə örtüklərin çəkilməsi onların rəng çalarlarının, işıq yayma keyfiyyətinin dəyişməsinə, ötürdüyü siqnalların, daşıdığı funksiyanın düzgün anlaşılmamasına səbəb ola bilər:

“Odur ki, “Yol hərəkəti haqqında” Qanunun 1 saylı Əlavəsinə əsasən, xarici işıq cihazlarının miqdarı, tipi, yerləşməsi və iş rejimi nəqliyyat vasitəsinin konstruksiyasının tələblərinə uyğun olmalıdır. Nəqliyyat vasitəsinin xarici işıq cihazlarından normativ tələblər pozulmaqla avadanlığın quraşdırılması və ya dəyişdirilməsi Azərbaycan Respublikasının İnzibati Xətalar Məcəlləsinin 342-ci maddəsinə əsasən, inzibati məsuliyyət yaradır”.