DYP qaydalara riayət etməyən sürücüləri cərimələdi | XƏBƏRDARLIQ

Dəfələrlə edilən xəbərdarlıq və cərimələrə baxmayaraq, hələ də avtobus zolağı və dayanacağını zəbt edən sürücülərə rast gəlinir.

Bakı Şəhər Dövlət Yol Polis İdarəsinin əməkdaşları səhər saatlarında şəhər ərazisində reyd keçiriblər.

Metronun ''Əhmədli'' stansiyasının qarşısında dayanacağı zəbt edən sürücülər cərimə ediliblər. Məhəmməd Hadi küçəsində avtobusların rahat hərəkəti üçün çəkilən zolağa daxil olan sürücülər də aşkar edildikcə cərimələniblər.

Bakı Şəhər Dövlət Yol Polis İdarəsinin bölmə rəisi Toğrul Nəsirlinin sözlərinə görə, təhlillər göstərir ki, zolağa daxil olan sürücülər ictimai nəqliyyatın rahat və fasiləsiz hərəkətinə ciddi maneə yaradır. Bildirilib ki, belə tədbirlər şəhər ərazisində mütəmadi olaraq davam etdiriləcək.

Qeyd edək ki, qanunvericilikdə avtobus və velosiped üçün nəzərdə tutulmuş zolaqlarda digər nəqliyyat vasitələrinin hərəkətinə görə 40 manat, dayanma və durmaya görə isə 20 manat cərimə nəzərdə tutulub.