İnsanları qorxudub deyirlər ki, sizi... | Xətaidə qanunsuz söküntü aparılır?

Xətai rayonu, Süleyman Vəzirov, 49 ünvanında aparılan söküntü işləri yaxınlıqda yaşayanların narazılığına səbəb olub.

Sakinlərin sözlərinə görə, işi görənlər onları qazsız, işıqsız, susuz qoyublar. Bir sözlə, bütün kommunal xətlərə ziyan dəyib.

“Bizim yaşadığımız ərazidə qanunsuz söküntü işləri aparılır. Bazar günü evdə oturduğumuz yerdə guppagup divarı dağıtdılar. Heç bir rəsmi bildiriş verilməyib, söküntü barədə də qərar göstərilməyib. Müraciət etməyə isə yerimiz yoxdur. Biz ancaq polisin, Fövqəladə Halların köməyi ilə qanunsuz söküntünü dayandırırıq. Ağır texnika ilə iş görülən zaman burada təhlükəsizlik qaydalarına riayət olunmur, evlərə ziyan dəyir”, – deyə narazı sakinlərdən biri bildirib.

Məsələ ilə bağlı Xətai Rayon İcra Hakimiyyətinin şöbə müdiri Pənah İmanov bildirib ki, söküntü işləri qanunvericiliyə uyğun olaraq, qurumun nəzarəti altında həyata keçirilir:

“Son bir neçə gündə artıq 70-ə yaxın ev sökülüb. Kommunal xətlərə ziyan dəyməsi ilə bağlı iradları qəbul edirəm. Bundan sonra ona da tam nəzarət olunacaq”.