Bakıda mikromobillik infrastrukturunun inkişafının əhəmiyyəti

İndiyədək Bakı şəhərində 31 küçə və prospektdə mikromobillik zolağı təşkil edilib. Zolaqların 100 km-ə çatdırılması nəzərdə tutulur.

Hazırda paytaxtda operatorlar tərəfindən 4760 ədəd mikromobillik vasitəsi icarəyə verilir. Sentyabr-dekabr ayları ərzində operatorlar tərəfindən 850 944 sifariş qəbul olunub.

Mikromobillik vasitələri ilə 2 244 302 km məsafə qət edilib.

Qısa məsafələr üçün nəzərdə tutulan bu alternativ nəqliyyat vasitələrinin bir sıra üstünlükləri var. Mikromobilllik şəbəkəsinin genişləndirilməsi ümumilikdə şəhərdə vətəndaşların mobilliyini artırır. Bundan başqa, ekoloji mühitə və əhalinin sağlamlığına müsbət təsir edir.

Ən önəmli məqam isə mikromobillikdən istifadə mərkəzdə avtomobillərdən istifadəni və sıxlığı azaldır. Mikromobillik vasitələri ilə qət edilmiş km-lər əks halda avtomobillərlə ediləcəkdi.

Sevindirici haldır ki, Bakıda velosiped və skuterlərin istifadəsi beynəlxalq göstəricilərdən yüksəkdir. Belə ki, beynəlxalq göstəricilərə əsasən, 1 velosiped gün ərzində 4-5 dəfə istifadə olunursa, Bakıda bu say 12-dir. Bu da mikromobillik vasitələrinin artırılmasına tələbatın olduğunu göstərir.

Nəzərə almaq lazımdır ki, yolların genişləndirilməsi ilə mərkəzdə sıxlığın azaldılması mümkün deyil. Bu, yalnız mərkəzdə avtomobillərin istifadəsinin azaldılması, əvəzində ictimai nəqliyyatın (metro, avtobus) inkişaf etdirilməsi, onlara üstünlük verilməsi və alternativ mobillik imkanları ilə mümkündür.

Əvvəlcədən infrastruktur yaradılmadan mikromobilliyin inkişafı mümkün deyil. Bütün ölkələrdə bu, belə olub. Bakıda mikromobillik infrastrukturun qurulması prosesində beynəlxalq təcrübə nəzərə alınıb. Barselona, Braqa, Nyu-York və Mayami kimi şəhərlərin təcrübəsindən istifadə olunub.