“Bakıda qala bilərsən, bakılı ola bilməzsən” | “Boşanmaq nədir, nəyin çatmır, ay qız?!” - O VAXTLAR

“O vaxtlar” verilişinin budəfəki qonağı Əməkdar artist Gövhər Rzayeva olub.

Ailə həyatı və cehiz ənənələrindən danışan Gövhər Rzayeva hesab edir ki, gənc ailəyə hər şeyi hazır şəkildə vermək düzgün deyil.

Onun sözlərinə görə, ər-arvad müəyyən şeyləri birlikdə əldə etdikdə həm bir-birinə daha çox bağlanır, həm də qazandıqlarının qədrini bilir:

“Bizim qızlara çox cehiz verməsinlər. Hər şey hazır olanda kişinin marağı bayırda olur. Qoy özləri çalışsınlar, alsınlar, əziyyət çəksinlər. Onda onun qədrini bilərlər. Biləndə ki, bu stəkanın biri var, biri yoxdur, əl-ələ verib çalışırlar”.

Keçmiş toy adətlərini xatırlayan Əməkdar artist qadın və kişi rəqsləri arasında əvvəllər aydın fərq olduğunu bildirib. O, müasir dövrdə bu sərhədlərin getdikcə itdiyini deyib:

“Qadının qadın kimi oynamağı var, süzməyi, sındırmağı var. İndi elə oynayırlar ki, sanki kişi oynayır. Qadınlar kişiləşib, kişilər də qadınlaşıb. Bilmirəm, nə yeyirlər, nə içirlər, bu havada nə var”.

“Sovetski”də böyüdüyünü deyən Gövhər Rzayeva bakılı olmağın yalnız paytaxtda yaşamaqla ölçülmədiyini vurğulayıb. Onun sözlərinə görə, köhnə Bakı məhəllələrində insanların özünəməxsus qayda-qanunları, mehribanlığı və bir-birinə hörməti olub:

“Bakıda yaşaya bilərsən, amma bakılı ola bilməzsən. Mən “Sovetski”nin göbəyində böyümüşəm. Oranın qanunları, qaydaları var idi. Qonşu qonşunun dadına, hayına çatardı. Açarını qonşuya verirdin, evini öz evindən də yaxşı qoruyurdu”.