Bakıda qiyməti milyonlarla manat olan mənzillər

Vaxtilə Bakı milyonçularından olmuş Şəmsi Əsədullayevin tikdirdiyi binadakı mənzil satışa çıxarılıb.

Baku TV-nin araşdırması nəticəsində məlum olub ki, Qoqol, Lev Tolstoy və Həzi Aslanov küçələrinin kəsişməsində yerləşən evdə sonradan “Neftçi Qurban” kimi tanınan Ağaqurban Əliyev və oğlu Yalçın Əliyev yaşayıb.

Bir neçə ay əvvəl həmin mənzildə Yalçın Əliyevin cəsədi aşkarlanıb. Mənzildə ondan başqa kimsə yaşamadığından məşhur neftçinin oğlunun ölümündən də ilk günlər heç kəs xəbər tutmayıb. Yalnız onun vəfatından 7 ay sonra mərhumun cəsədi dövlət strukturlarının əməkdaşları tərəfindən aşkarlanaraq dəfn edilib.

Hazırda mənzil satışa çıxarılıb. Əmlak saytlarından birində yerləşdirilən elanda 200 kvadratmetr sahəsi olan sözügedən mənzilin 1 milyon 200 min manata satıldığı, real müştəriyə endirim olunacağı qeyd edilib.

Paytaxtda isə tarixi binalarla yanaşı, yeni tikilən binalarda da qiyməti milyonlarla olan mənzillərə rast gəlmək mümkündür.

Əmlakçıların sözlərinə görə, paytaxtda ən bahalı mənzilin bir kvadratmetrinin qiyməti 8000 manatdır. Köhnə binalarda satışa çıxarılan mənzillərin qiyməti 3-4 milyon manata qədər yüksəlir. Lakin vasitəçilər deyirlər ki, bu qiymətə köhnə tikililərdə mənzil alışı çox az hallarda olur.