Bakıda tələbələr saqqala görə dərsə buraxılmadı | Prorektordan açıqlama

Paytaxtdakı ali məktəblərin birində təhsil alan tələbələr saqqala görə dərsə buraxılmayıblar.

Nəticədə onlar dərslərdən geri qaldıqlarını, qayıb limitini doldurduqlarına görə imtahana buraxılmadıqlarını deyiblər.

“Səhər tezdən universitetə gəlmişəm, saqqala görə dərsə buraxmırlar. Hansı qanunda yazılıb ki, saqqallı tələbə dərsə daxil ola bilməz?”, – tələbə öz narazılığını bildirib.

Məsələ ilə bağlı universitetin prorektoru Cavidan Heydərov bildirib ki, tələbələrin saqqala görə dərsə buraxılmamağı həqiqəti əks etdirmir. Lakin tələbələrə verilən yaddaş kitabçalarında onların dərsə mütləq şəkildə səliqəli formada gəlməli olduğu vurğulanıb:

“Tələbələrin məhz saqqal saxladıqlarına görə universitetə buraxılmaması bizim qaydalarımızda yer almır, bu məsələ bizim gündəliyimizdə deyil. Məsələnin əsli isə tamamilə başqadır.

Həmin tələbələr dərsə bir xeyli müddət gecikiblər. Belə olan halda onlar tədrisin gedişatına mane olurlar. Rəhbərlik həmin tələbələrlə nizam-intizam qaydalarına riayət etmələrinə dair tərbiyəvi söhbət aparıb və universitetə daha səliqəli formada gəlmələrinə dair məlumat verilib”.