Bəzi parklardan attraksionlar niyə yığışdırıldı? | Valideynlər və azyaşlılar narazıdır

Paytaxtda insanların dincəlməsi üçün kifayət qədər parklar salınıb.

Amma təəssüf ki, bu parklarda uşaqların əyləncəsi nəzərə alınmayıb. Bir sözlə, Bakıda bir çox parklarda attraksionlar ya yoxdur, ya da işləmir.

Bu da həm valideynlərin, həm də uşaqların narazılığına səbəb olur.

“Əvvəl attraksionlar var idi. İndi yoxdur deyə əylənə bilmirəm”, – azyaşlı deyib.

Bəs görəsən niyə parklarda attraksionlara rast gəlinmir. Onların fəaliyyəti nəyə görə dayandırılıb?

Məsələ ilə bağlı Fövqəladə Hallar Nazirliyindən bildirilib ki, 2024-cü ilin ötən dövrü ərzində Bakı şəhərində yerləşən müxtəlif məkanlarda aparılmış yoxlamalar nəticəsində ümumilikdə 18 ədəd mexanikləşdirilmiş attraksionun istismarı ilə bağlı nöqsanlar aşkar edilib. Bu səbəbdən həmin attraksionların fəaliyyəti dayandırılaraq qanunvericiliyin tələblərinə uyğun olaraq müvafiq tədbirlər görülüb.

Dənizkənarı Bulvar İdarəsindən isə bildirilib ki, Bulvar ərazisindən yığışdırılan attraksionlar müasir tələblərə cavab vermir, istismar müddətini başa vurub. Köhnəlmiş attraksionların yığışdırılması həm də təhlükəsizlik baxımından vacib idi. Onların yeni nəsil attraksionlarla əvəzlənməsi istiqamətində işlər aparılır.