Bu gün Azərbaycan Əlifbası və Azərbaycan Dili Günüdür! - Baku TV

Avqustun 1-i Azərbaycan Əlifbası və Azərbaycan Dili Günü kimi qeyd edilir.

Bu tarixi gün ümummilli lider Heydər Əliyevin 2001-ci il 9 avqust tarixli Fərmanı ilə təsis edilib.

Ulu öndər latın qrafikalı Azərbaycan əlifbasına keçidin ölkədə 2001-ci ilin avqustunda bütövlükdə təmin olunduğunu və bunun yeni müstəqil Azərbaycanın ictimai-siyasi həyatında, yazı mədəniyyəti tarixində mühüm hadisə olduğunu nəzərə alaraq bu addımı atmışdı.

Xatırladaq ki, hələ sovet dövründə, 1977-ci ildə SSRİ-nin yeni Konstitusiyasına dövlət dili haqqında maddənin salınması ilə heç cür barışmayan Heydər Əliyev bu məsələdə sonadək qətiyyətli və prinsipial mövqe nümayiş etdirmişdi. Nəticədə, 1978-ci il aprelin 21-də Azərbaycan SSR Konstitusiyasının 73-cü maddəsində edilən dəyişikliklərə əsasən, respublikanın dövlət dilinin Azərbaycan dili olduğu rəsmən təsbit edildi.

Ulu öndər Heydər Əliyev tərəfindən təməli qoyulan bu məqsədyönlü dil siyasəti bu gün Prezident İlham Əliyev tərəfindən uğurla davam etdirilir.

Beləliklə, Azərbaycan dilinin saflığının qorunması və dövlət dilindən istifadənin təkmilləşdirilməsi istiqamətində mühüm tədbirlər görüldü.

Bir sözlə, ana dilimizə və əlifbamıza göstərilən dövlət qayğısı bu gün də yüksək səviyyədə davam etdirilir.