Binəqədidəki faciəvi partlayışdan təcili xəbər | Məhkəmədə barışıq əldə olundu, yoxsa...?

Bakının Binəqədi rayonundakı "Bakı Ağac Emalı" ASC-nin ərazisində baş verən partlayışla bağlı təqsirləndirilən Tağı İbrahimov və Toğrul Rzayevin cinayət işinin növbəti məhkəmə prosesi keçirilib.

Bakı Ağır Cinayətlər Məhkəməsində hakim Elmir Rüstəmovun sədrliyi ilə baş tutan iclasda zərərçəkənlərlə təqsirləndirilənlər arasında imzalanmış barışıq ərizələrinin məhkəməyə daxil olunması elan edilib.

Ərizələrin elanı zamanı bəlli olub ki, təqsirləndirilən şəxslər zərərçəkənlərə dəymiş zərərin ödənilməsində əhəmiyyətli addımlar atıblar.

Hadisə zamanı dünyasını dəyişən Adil Rüstəmovun atası Aydın Rüstəmov hüquqi varis kimi təqsirləndirilən Tağı İbrahimovla barışmadığını deyib. O, oğlunun sözügedən hadisəyədək 800 manat maaş aldığını və hazırda 2 yaşlı övladının olmasını bildirib.

Hüquqi varisin dediklərinə cavab olaraq təqsirləndirilən Tağı İbrahimov dünyasını dəyişən Adil Rüstəmovun 2 yaşlı övladının 18 yaşı tamam olanadək ona hər ay 500 manat ödəməyinə söz verib. Hüquqi varis isə bu təkliflə razılaşmayıb.

Sonra iclasda iştirak etməyən bir neçə şahidin ifadələri elan edilib. Prosesdə dindirilməsi zəruri olan sonuncu iki şahidin ifadələri sentyabrın 24-nə təyin olunmuş növbəti iclasda alınacaq.