Tanışını bıçaqlayıb qaçmaq istədi, maşın vurdu | Cinayətkar məhkəmədə dindirildi - Baku TV

Bakının Yasamal rayonunda Azər İbrahimovu qətlə yetirməkdə təqsirləndirilən və əvvəllər məhkum olunmuş Təbriz Həsənovun cinayət işinin sonuncu məhkəmə baxışı keçirilib.

Bakı Ağır Cinayətlər Məhkəməsinin hakimi Elnur Nuriyevin sədrliyi ilə keçirilən prosesdə prokuror dövlət ittihamını müdafiə edərkən təqsirləndirilənin 20 il azadlıqdan məhrum edilməsini məhkəməyə təklif edib. Müşavirədən sonra hökm oxunaraq Təbriz Həsənov 18 il azadlıqdan məhrum olunub.

Qeyd edək ki, 2024-cü ilin oktyabrın 13-də saat 22:00 radələrində paytaxtın Yasamal rayonu ərazisində 1987-ci il təvəllüdlü Azər İbrahimovu kəsici alətlə qətlə yetirməkdə şübhəli bilinən, əvvəllər məhkum olunmuş Təbriz Həsənov polis əməkdaşlarının keçirdikləri tədbirlərlə müəyyən edilərək istintaqa cəlb edilib.

Araşdırmalarla məlum olub ki, Azər İbrahimov tanışları ilə birlikdə restoranda yeyib-içdikdən sonra yaranmış mübahisə zamanı qolundan və kürəyindən bıçaq xəsarətləri alıb. O, ağır vəziyyətdə dərhal Kliniki Tibbi Mərkəzə çatdırılsa da, tibbi yardımlara baxmayaraq, onun həyatını xilas etmək mümkün olmayıb. Təbriz Həsənov isə cinayəti törətdikdən sonra hadisə yerini tərk edərkən naməlum avtomobil tərəfindən vurulması nəticəsində aldığı xəsarətlərlə xəstəxanaya yerləşdirilib. Polis nəzarətində onun müalicəsi bitdikdən sonra barəsində həbs qətimkan tədbiri seçilərək ona qarşı cinayət məcəlləsinin 120.2.4-cü (xüsusi amansızlıqla adam öldürmə) maddəsi ilə ittiham elan edilib.