Bakının mərkəzində binalar niyə sökülür? | Sakinlərdən açıqlama - Baku TV

Paytaxtın mərkəzində 3 bina sökülür. Söhbət Xaqani küçəsi, 54 və Üzeyir Hacıbəyli küçəsi, 51 ünvanlarında yerləşən 2 beşmərtəbəli, eləcə də Kövkəb Səfərəliyeva küçəsi, 2 ünvanındakı çoxmərtəbəli binadan gedir.

Artıq binalardakı mənzillərin böyük hissəsi boşaldılıb, sakinlər köçürülüb və söküntü işlərinə start verilib.

Sakinlərdən birinin sözlərinə görə, qonşularla razılıq əldə olunub və evlərin sökülməsi barədə qərar qəbul edilib. Onlara mövcud mənzillərin əvəzində yeniləri təklif olunub.

Söküntü işlərini həyata keçirən şirkətin rəsmisi Emil Hacıyev bildirib ki, hazırda ərazidə texniki təhlükəsizlik tədbirləri görülür və müvafiq baryerlər quraşdırılır.

Qeyd edək ki, bir-birinə yaxın ərazidə yerləşən 3 bina söküldükdən sonra onların yerində yeni, müasir çoxmərtəbəli yaşayış kompleksinin inşası planlaşdırılır. Layihənin yaxın illərdə yekunlaşdırılması nəzərdə tutulur.