"Gör nə həddə çatıb ki..." - Şüvəlanda dostunu öldürən şəxsin qonşusu gördüklərini danışdı- Baku TV

Bakıda iki dost arasında düşən mübahisə qətllə nəticələnib.

Hadisə Xəzər rayonunun Şüvəlan qəsəbəsində qeydə alınıb.

Məlumata görə, 43 yaşlı İqor Lisenko dostu 53 yaşlı İlqar Məmmədovla maşında olan zaman aralarında mübahisə düşüb. Bu zaman İqor İlqara üzərində gəzdirdiyi bıçaqla çoxsaylı xəsarətlər yetirib.

“Mən evdə deyildim, rəfiqəmin ad gününə getmişdim. Gələndə gördüm ki, onlar binanın qarşısında maşında oturublar. Evə qalxdım. Səhər qonşu gəlib soruşdu ki, dünən olanlardan xəbərin var? Dedim yox, mən yatmışdım. Qonşu dedi ki, İqor İlqarı bıçaqlayıb öldürüb. Dəhşətə gəldim. İqor çox yaxşı insan idi. Gör o, nə həddə çatıb ki, bu hərəkəti edib”, – deyə qonşu hadisə barədə danışarkən bildirib.

Baş Prokurorluğun yaydığı məlumata görə, İqor Lisenko iş üzrə prokurorluq tərəfindən şübhəli şəxs qismində tutulub.

Faktla bağlı Xəzər rayon prokurorluğunda Cinayət Məcəlləsinin 120.1-ci (qəsdən adam öldürmə) maddəsi ilə cinayət işi başlanılıb, araşdırma aparılır.