"Biz hələ Şərqi düz-əməlli öyrənməmişik” | Köklərimizdən uzaqlaşmaq gələcəyimizi necə dəyişdirir?

“Amin” verilişinin yeni buraxılışında şair, publisist Arzu Əsədlə din və müasirlik, elmin və rasional düşüncənin cəmiyyətdəki rolu, Şərq və Qərb fəlsəfəsi, milli-mənəvi dəyərlər və ailə institutunun gələcəyi barədə fikir mübadiləsi aparılıb.

Arzu Əsəd elmin digər idrak formalarından üstün tutulmasının və dini təfəkkürün köhnəlmiş yanaşma kimi təqdim edilməsinin düzgün olmadığını bildirib:

“Bugünkü rasionalizm bəşər təfəkkürünün keçdiyi bütün idrak növlərini – mifologiyanı, fəlsəfəni, dini təfəkkürü, ezoterizmi – öz içinə alan genişlənmiş bir rasionalist baxışdır”.

Şair milli-mənəvi köklərdən uzaqlaşmanın cəmiyyətin gələcəyinə təsir göstərə biləcəyini deyib. Onun sözlərinə görə, tarixi və mədəni dəyərlərin qorunması ilə yenilik və inkişaf arasında balans yaradılmalıdır.

Verilişdə ailə institutunun zəifləməsi və ailələrdə uşaq sayının azalması məsələsinə də toxunulub. Arzu Əsəd fərdiyyətçilik və şəxsi maraqların ön plana çıxmasının ailə və cəmiyyət münasibətlərinə təsir etdiyini bildirib.

O, ailə institutunun cəmiyyətin gələcəyi baxımından mühüm əhəmiyyət daşıdığını vurğulayaraq ənənəvi dəyərlərin müasir həyatla uzlaşdırılmasının vacibliyini qeyd edib.