Bu şəhər sizə gözlədiyinizdən daha çoxunu təklif edir | "The Telegraph" Bakının gözəlliyindən yazdı

Britaniyanın məşhur “The Telegraph” nəşrində Azərbaycan və paytaxt Bakının gözəlliyindən bəhs edən məqalə dərc olunub.

Məqalənin müəllifi olan jurnalist Anna Selbi COP29 günlərində ölkəmizə səfər edib və öz təəssüratlarını oxucularla bölüşüb. Onun sözlərinə görə, Bakı kiçik bir xəzinədir.

“Bakı qədim İpək Yolunun Xəzər dənizi sahilindəki mərkəzidir. İçərişəhərdə hələ də karvansaraylar – müasir mehmanxana və restoranlar yerləşir.

Bu daş döşənmiş küçələrin mərkəzində Şirvanşahlar sarayı dayanır (xüsusilə vurğulanıb ki, UNESCO onu “memarlıq incisi” kimi təsvir edir). Şirvanşahlar sarayı məqbərəsi, hamamı, sərdabələri, qədim məscidi və yeraltı həbsxanaları olan bir labirintdir.

Yaxınlıqdakı Qız qalasının 12-ci əsrdə tikildiyi güman edilir. Bu şəhərdə çoxlu işğalçılar olub, hamısı öz izlərini qoyub. Məsələn Böyük Pyotr Rusiyadan gəlib və daha çox qədim məscidin minarəsini zədələməklə yadda qalıb.

Qədimliyini qoruyub saxlayan Bakı həm də müasir şəhərdir. Alov formalı üç göydələn şəhərin gecə səmasını işıqlandırır. Azərbaycan kifayət qədər liberal mədəniyyətə malikdir. Bir sözlə, Bakı sizə gözlədiyinizdən daha çoxunu təklif edir”, – deyə məqalədə bildirilib.