“Çayda namaz qılır, düzgündür?!" | Bu kənddə həyat sanki 21-ci əsrdə deyil - KƏNDİNƏ QAYIT

“Kəndinə qayıt” verilişinin yeni buraxılışında Qəbələ rayonunun Tikanlı kəndinə səfər edilib.

Rayon mərkəzindən 11 kilometr aralıda yerləşən, təxminən 2000 nəfərin yaşadığı bu dağətəyi kənddə əhalinin əsas məşğuliyyəti kənd təsərrüfatıdır. Alma, armud və fındıq bağları, eləcə də tərəvəzçilik və heyvandarlıq kənd sakinlərinin əsas dolanışıq mənbəyidir.

Kənd sakini Dursun Bayramov bildirib ki, Tikanlı kəndi Azərbaycan ədəbiyyatında da öz izini qoyub. Onun sözlərinə görə, İsmayıl bəy Qutqaşınlının “Rəşid bəy və Səadət xanım” əsərində Rəşid bəy sevgilisi Səadət xanımı məhz bu kəndə gətirərək Molla Mərdan kişinin evində gizlədib və bununla kənd əhalisinin etibarı, sədaqəti və sözünə bütövlüyü tərənnüm olunub.

Verilişdə kənd sakinlərinin üzləşdiyi sosial problemlərə də toxunulub.

Kənd sakini Gülgəz Cabbarova bildirib ki, Tikanlıda məscid olmadığından insanlar dini ayinləri çay kənarında və ya açıq sahələrdə yerinə yetirməyə məcbur qalırlar. O, kənddə məscidlə yanaşı, yol, qaz və körpü kimi əsas infrastruktur problemlərinin də uzun illərdir həllini gözlədiyini diqqətə çatdırıb.