Cəbrayılda dəhşətli partlayış | Ölən DSX hərbçisinin fotosu yayıldı

Dövlət Sərhəd Xidmətinin hərbi qulluqçusu Əsgər Nicat oğlu Musayev Cəbrayılda minaya düşərək həlak olub.

“Report”un verdiyi məlumata görə, mərhumun nəşi dəfn olunması üçün Lənkəran rayonuna gətirilib. Əsgər Musayev Göyşaban kənd qəbiristanlığında torpağa tapşırılacaq.

Qeyd edək ki, Ombudsman Səbinə Əliyeva Cəbrayıl və Ağdamda baş verən mina hadisələrinə münasibət bildirib. Qeyd edib ki, bu faciə regionda mina təhlükəsinin hələ də davam etdiyini və günahsız insanların həyatının hər an təhdid altında olduğunu bir daha ortaya qoyur.

Bildirilib ki, 2020-ci ildən etibarən Ermənistan tərəfdən basdırılmış minalar, həmçinin partlamamış hərbi sursatların partlaması nəticəsidə 392 nəfər həlak olub və ya yaralanıb.

“Bu, yalnız fiziki deyil, həm də insanların psixoloji və sosial baxımdan dərindən təsirləndiyi ciddi bir problemdir. Ombudsman olaraq beynəlxalq ictimaiyyəti Azərbaycanın davam edən mina təmizləmə səylərinə dəstək olmağa və həmçinin Ermənistanı məqsədli şəkildə və geniş miqyasda basdırılmış minalara görə məsuliyyətə cəlb etməyə çağırıram”, ‒ deyə məlumatda qeyd olunub.