Cənnətdə kimləri görə bilərik? - Müğənni və ilahiyyatçı qarşı-qarşıya | AMİN

“Amin” verilişinin yeni buraxılışı yayımlanıb.

Proqramda müğənni Çingiz Mustafayev və ilahiyyatçı Əhməd Niyazovla özünüdərk mövzusu müzakirə olunub.

Özünüdərk prosesinin qeybə çəkilməyi tələb etdiyini deyən Ç.Mustafayev bildirib ki, təkliyi xalqın içində yaşamaq çox çətindir:

“Həyat onun bütün çalarlarını daddığımız zaman çox gözəl olar. Mənim üçün özünüdərk tənhalıq tələb edir. İnsan dərketmə yoluna çıxıbsa və bunu ürəkdən istəyirsə, gec-tez dünyadan uzaqlaşaraq özü ilə tək qalacaq”.

Müğənninin sözlərinə görə, bəzi ruhları digərləri ilə müqayisə etmək olmaz, çünki onlar həyata konkret missiya üçün gəliblər:

“Məsələn, sevgini təbliğ etmək, nəsə öyrənmək, qlobal dəyişikliklər etmək və ya zərər vurmaq üçün. Elə ruhlar var ki, onlar dərk etməməlidirlər. Həyatda hər şey nisbidir. Hamı Allah adamı olmamalıdır”.

Əhməd Niyazov isə bildirib ki, insan maddə və mənadan ibarətdir:

“İnsan məna sahibi olanda özünü dərk etmiş hesab olunur. Bütün kainat dünyaya, dünya da bizə xidmət edir. Həyat insanın canlılığını təmin etmək üçündür. Onun Allahı tanıması birinci vəzifəsidir. Özünü dərk etməyən Yaradanı görə bilməz”.