Dahi bəstəkar Üzeyir Hacıbəylinin anadan olmasının 140-cı ildönümüdür

18 sentyabr Milli Musiqi Günüdür.

1885-ci il sentyabrın 18-də dahi bəstəkar Üzeyir Hacıbəyli anadan olub. Məhz bu tarix Azərbaycanda Milli Musiqi Günü kimi qeyd olunur.

Ümummilli Lider Heydər Əliyevin müvafiq Fərmanına əsasən, bu gün münasibətilə hər il Azərbaycanın müxtəlif bölgələrində silsilə tədbirlər təşkil olunur.

Dahi bəstəkar, Azərbaycan musiqi sənətinin banisi, Şərqdə ilk operanın müəllifi kimi tanınan, ictimai xadim Üzeyir Hacıbəylinin anadan olmasının 140-cı ildönümü tamam olur.

2025-ci il fevralın 3-də Prezident İlham Əliyev Şərqdə ilk operanın yaradıcısı, istedadlı publisist, dramaturq və pedaqoq, tanınmış ictimai xadim Üzeyir Hacıbəylinin anadan olmasının 140 illiyi münasibətilə Sərəncam imzalayıb.

Görkəmli bəstəkarın anadan olduğu gün həm də Üzeyir Hacıbəyli Beynəlxalq Musiqi Festivalının açılışı ilə əlamətdardır. Bu il festival 17-ci dəfə zəngin proqramla tamaşaçıların görüşünə gələcək. Heydər Əliyev Fondunun və Mədəniyyət Nazirliyinin təşkilatçılığı, Türk Mədəniyyəti və İrsi Fondu, eləcə də ICESCO-nun dəstəyi ilə reallaşacaq festival sentyabrın 28-nə kimi davam edəcək.

Bakı, Sumqayıt, Şuşa, Gəncə, Ağcabədi, Naxçıvan və Qazax şəhərlərində keçiriləcək tədbirlər çərçivəsində konsertlər, tamaşalar, sərgilər, elmi simpozium və ustad dərsləri də baş tutacaq.

Festivalda Azərbaycan musiqiçiləri ilə yanaşı, Türkiyə, ABŞ, Almaniya, İsveçrə, Fransa, Cənubi Koreya və digər ölkələrdən olan tanınmış ifaçılar və musiqişünaslar çıxış edəcəklər.

Həmçinin görkəmli bəstəkarın 140 illik yubileyi münasibətilə bir sıra ölkələrdə müxtəlif səpkili silsilə tədbirlər təşkil olunacaq.