Daşınmaz əmlaklarla bağlı diqqət yetirilməli amillər - Baku TV

Azərbaycan Qiymətləndiricilər Palatasının yaydığı məlumata görə, iyun ayı üzrə daşınmaz əmlak indeksi 106,7 bənd təşkil edib.

Bu göstərici may ayı ilə müqayisədə 0,7 %, bazar dövrü kimi qəbul edilən 2025-ci ilin dekabr ayına nisbətən isə 6,7 % yüksəkdir. İndeksdəki dəyişiklik daşınmaz əmlak bazarında qiymət artımının davam etdiyini göstərir.

Bu baxımdan bazarın demək olar ki, bütün seqmentlərində bahalaşma müşahidə olunur. Qiymət artımının davam etməsi, eləcə də investisiya alətlərinin məhdudluğu daşınmaz əmlaka yatırım məsələsini daha da aktuallaşdırır.

Bəs daşınmaz əmlakın hansı seqmentinə yatırım etmək daha sərfəlidir?

Daşınmaz əmlak üzrə ekspert Ramil Osmanlı bildirib ki, son illərin müşahidələri şəhər mərkəzində və mərkəzə yaxın ərazilərdə yerləşən bir və ikiotaqlı mənzillərə marağın artdığını göstərir:

“Bu tip mənzillərə maraq göstərənlərin sayı daha çoxdur. Vətəndaşlar həmin mənzilləri əsasən investisiya məqsədilə alır, təmir edir və kirayəyə verirlər. Baxmayaraq ki, onların gəlirlilik dərəcəsi qeyri-yaşayış obyektləri ilə müqayisədə daha aşağıdır, bu mənzillər daha asan kirayəyə verildiyi və boş qalma ehtimalı az olduğu üçün likvid əmlak hesab olunur. Buna görə də onlara maraq ildən-ilə artır”.

Bununla belə, ekspert hesab edir ki, gəlirlilik baxımından qeyri-yaşayış sahələri digər daşınmaz əmlak növləri ilə müqayisədə investisiya üçün daha səmərəli hesab oluna bilər.