Daxili orqanlar hansı halda tərs yerdə yerləşir?

Bəzi insanlarda ürək və mədə kimi daxili orqanlar bədənin əks tərəfində yerləşir.

“Situs inversus” adlanan bu nadir hal genetik fərqlilik kimi tanınır.

Bəs bu, sağlamlıq üçün təhlükəlidirmi? Bu fərqlilik doğuşdan mövcud olan genetik mutasiyalar nəticəsində yaranır. Lakin bunun tək bir genlə bağlı olmadığı, 100-dən çox genin və ətraf mühit amillərinin də təsirli ola biləcəyi məlumdur. Məsələn, hamiləlik zamanı ananın şəkərli diabeti, tütün məmulatlarından istifadə və ya bəzi dərmanlar bu vəziyyəti yarada bilir.

“Situs inversus totalis” əksər hallarda sağlamlıq baxımından ciddi problem yaratmır. Orqanlar tərs tərəfdə yerləşmələrinə baxmayaraq, funksiyalarını normal şəkildə yerinə yetirə bilirlər.

Bir çox insan bu vəziyyəti yalnız tibbi müayinə və ya cərrahi əməliyyat zamanı təsadüfən öyrənir. Ancaq müdaxilə tələb edən hallarda həkimlərin orqanların gerçək yerləşimini bilməsi həyati əhəmiyyət daşıyır.

Bu səbəbdən bəzi şəxslər tibbi xəbərdarlıq bilərziyi daşımalıdır.

“Situs ambiguus” adlanan daha mürəkkəb vəziyyətdə isə orqanların yalnız bir hissəsi tərs yerləşir və bu, ciddi ürək xəstəlikləri, mədə-bağırsaq sistemi anomaliyaları və dalaqla bağlı problemlərlə müşayiət oluna bilər. Belə hallarda müalicə fərdi yanaşma tələb edir və bəzi körpələrdə doğuşdan dərhal sonra tibbi müdaxilə vacib ola bilər.