“Dedi, gəl qızımı al, evimi də verirəm” | İnternatda böyüyən ata 9 uşağı necə saxlayıb?

“Arzunun vaxtı” verilişinin yeni buraxılışı yayımlanıb.

Budəfəki buraxılışın qəhrəmanı Lənkəran rayonunun Separadi kənd sakini, 9 uşaq atası Qədim Rzayevdir.

52 yaşlı kişinin ilk evliliyindən 1, ikinci evliliyindən isə 8 övladı var.

Səhhətində yaranan problemlər səbəbi ilə hazırda işləməyən Qədim Rzayev pensiya alır. Uşaqları üçün isə dövlət tərəfindən müavinət verilir.

Həyat hekayəsindən danışan Qədim valideynlərini uşaq yaşlarında itirdiyini və internat məktəbində böyüdüyünü deyib. Yetkinlik yaşına çatandan sonra isə ailə həyatı qurub:

“Bir qadın mənə yaxınlaşıb dedi ki, qızımla evlən, evi də sənə verəcəyəm. Evləndik, amma qaynım narkotik aludəçisi idi, yaşamağa imkan vermirdi. Deyirdilər ki, evdən çıx, özünə ev tik, amma mənim bunu etməyə imkanım yox idi deyə boşandıq”.

O, 13 il davam edən evliliyindən sonra 2006-cı ildə ikinci dəfə ailə həyatı qurub.

“Kənddə bir qızı istədim. Ailəsi gördü ki, həm işləyirəm, həm də pensiya alıram. Dedilər, qızımızı səndən yaxşısına verməyəcəyik ki?!”, – deyə Q.Rzayev bildirib.

Qədim çoxuşaqlı ata olmağın üstünlüklərindən də danışıb:

“Çoxlu uşağın olanda sözün keçir, səni eşidirlər”.