"Dəmirləri çöldədir, yağış suyu evdə" | Sakinlərin dərdinə niyə çarə qılan yoxdur? - Baku TV

Mingəçevir şəhərinin Şah İsmayıl Xətai küçəsində yerləşən binanın sakinləri Baku TV-nin qaynar xəttinə müraciət ediblər.

Onlar bildirirlər ki, binanın dam örtüyü sıradan çıxdığından yağış suları evlərə, hətta zirzəmiyə qədər gəlib çatır.

Təxminən 40 il əvvəl tikilən binada 100-dən artıq sakin yaşayır. Onlar hazırda binanın qəzalı olduğunu və müraciətlərinə baxılmadığını bildirirlər.

“Armaturların hamısı çöldədir. Bir dəfə də partlayış olub. Vallah, qorxa-qorxa yaşayırıq”, – sakinlərdən biri deyib.

Digər sakin isə bildirib ki, bina kooperativ olduğu və dövlət balansında olmadığı üçün baxımsız vəziyyətdə qalıb:

“Dəmir armaturlar çöldədir, yağış suyu isə evlərə dolur. Sakinlər öz vəsaitləri hesabına müəyyən işlər görə biliblər. Amma son 15-18 il ərzində heç nə edə bilmirik, büdcəmiz buna imkan vermir”.